ወላይታ ልማት ማህበር በወላይታ ዞንና በወላይታ ሶዶ ከተማ አስተዳደር SNV ከተሰኘ ግብረ ሰናይ ድርጅት ጋር በመተባበር የወተት ምርትና ምርታማትን ለማሳደግ BRIDGE+ ፕሮጀክት እየተገበረ እንደሚገኝ ይታወቃል፡፡
ከፕሮጀክቱ ተግባራት አንዱ የትምህርት ቤቶች ወተት ምገባ ሲሆን በዚህም ተማሪዎች በስነ ምግብ ዳብረው ትምህርትን በአግባቡ ተከታትለው መፃኢ ተስፋቸው ብሩህ እንዲሆን በትኩረት እየተሰራ ነው፡፡
ማህበሩ ለሚተገብረው የትምህርት ቤት ወተት ምገባ ተግባር የሚውለውን የወተት ጥራትና ደህንነት ለማሻሻል በወተት ምርት ሰንሰለት የሚገኙ ባለድርሻ አካላትን ግንዘቤ ለማሻሻል ከ02-03/02/2018 ዓ.ም. ለሁለት ቀናት የቆየ ስልጠና በወላይታ ጉታራ ሆቴል፣ ቱሪዝምና ስልጠና ማዕከል እና በኤክሶደስ ፋርም ኢንተርፕራይዝ ተሰጥቷል፡፡
በስልጠናው የወላይታ ልማት ማህበር ዋና ስራ አስፈጻሚ አቶ አሰፋ ናና እንደገለጹት ለተማሪዎች የሚቀርበው ወተት ጥራቱና ደህንነቱ መጠበቅ እንዳለበት አሳስበዋል፤ ጨምረውም በወተት ምርት ሰንሰለት ስራ የተሰማሩ አካላት ከዚሁ ስልጠና ባገኙት ግንዛቤ ራሳቸው በማሻሻልና ማህበሩ የፕሮጀክቱን ዓላማ ከግብ ለማድረስ በሚያደርገው ርብርብ የበኩላቸውን አስተዋጽኦ እንዲያበረክቱ መልዕክት አስተላልፈዋል፡፡
በወላይታ ልማት ማህበር የSNV- BRIDGE+ ፕሮጀክት አስተባባሪ አቶ ዮሐንስ ሌንጫ በተመሳሳይ ወተት በባህሪው ጥንቃቄ የሚፈልግ የምግብ ምርት ዓይነት ስለሆነ በዘርፉ የተሰማሩ አካላት ለጥራቱና ደህንነቱ ትኩረት በመስጠት ስራውን መስራት እንዳለባቸው ገልጸው የፕሮጀክቱ አንዱ ተግባር ይህንን ማረጋገጥ መሆኑን ገልጸዋል፡፡
የስልጠናው ተሳታፊ አካላትም የራሳቸውን ተሞክሮ ለተሳታፎዎች በመግለጽ የወተት አያያዝ በጥራትን ንጽህና መሆን እንዳለበት ገልጸዋል፡፡ ይሀም ከአለባ ጀምሮ የወተት ምርቱ ለተጠቃሚው እስከሚደርስ አያያዙ በጥንቃቄ መሆን እንዳለበት በባለሙያ ድጋፍ መሆን እንዳለበት በስልጠናው በስፋት ተብራርቷል፡፡
በስልጠናው የወላይታ ዞንና ወላይታ ሶዶ ከተማ አስተዳደር ጤና መምሪያና ህረት ስራ ጽህፈት ቤት ኃላፊዎች፣ የቦዲቲ ከተማ አስተዳደር ህብረት ስራ ጽህፈት ቤት ኃለፊ፣ የወተት ግብይት ህብረት ስራ ማህበራት አስተባባሪዎች፣ ወተት አምራቾችና አቀነባባሪዎች እንዲሁም የወተት ምገባ ከሚካሄድባቸው ትምህርት ቤቶች የተወጣጡና ምገባውን የሚያስተባብሩ መምህራን ተሳትፈዋል፡፡
